Үхибүү хүмүүжүүлхэ - минии нангин уялга

  Эгээл гоё, эгээл хүхюутэй сагай үүдэ нээжэ, оршон тойронхи юртэмсын, эхэ байгаалиин бүхы үнгэнүүдтэйтанилсуулдаг, хэзээдэшье түгэсхэдэггүй бага наһанай шэдитэ орон руу таанадаа уряалнаб! Амар мэндээ! 

         Би - Биликма Дондокдоржиевна Анзанова,  Хэжэнгэ нютагай «Жаргал» сэсэрлигэй хүмүүжүүлэгшэб. 

      Манай сэсэрлиг - ордон шэнги hайхан, hаруул 2 дабхар байшан. 2011 оной зунай сагта үүдээ үргэнөөр сэлижэ, эдир багашуулые угтан абаһан түүхэтэй. 

         Эндэмнай 5 бүлгэмүүд, олон гэгшын хүмүүжүүлмэлнүүд, хүдэлмэришэд. 

   Октябрь һарын 2020 онһоо эхилжэ, манай «Жаргал» сэсэрлиг «Монолингвальная речевая этнокультурная развивающая среда ДОО на бурятском языке» гэһэн проектэдэ оронхой.   Үхибүүдэй буряад аман хэлэ хүгжөөжэ, буряадаар ойлгохо, хөөрэлдэжэ шадаха аргатай болгохо, түрэл хэлэндээ, ёһо заншалнуудта дуратайгаар хүмүүжүүлхэ гэhэн зорилготойбди. Элдэб шэнэ үеын онол аргануудые хэрэглэн, тэрэнэй баялигые багашуулда наһандань таарамжатайгаар харуулха гээшэ гол шухала зорилго болоно.

      Би ахалагша бүлгэмэй хүмүүжүүлэгшэб. Үглөөгүүр бүри ажалдаа ерэхэдээ,  хэды олон түргэн шуумай хүлхэнүүдые, далай шэнги оёоргүй,   хэды олон һонюуша нюдэнүүдые, хэды олон зөөлэн гархануудые би харанабиб даа!

       Мүнөөнэй үхибүүд олон юумэ мэдэдэг болонхой. Тэдэ элдэб гаджет, компьютер болон мобильна телефонуудые шуран бэрхээр хэрэглэжэ шададаг. Тиимэһээ  шэнэ үеын хүмүүжүүлэгшэ   үхибүүдһээ дутангүй ФГОС-ой эрилтэнүүдые дахажа, сагтай адли урагшаа ябаха шадабаритай, тааруу байха ёһотой. Үхибүүдэй эхэ эсэгэнэр сүлөөгүй ажаллана, тиибэшье үри хүүгэдэйнгээ сэсэрлигтэ байһан ажабайдалаарнь һонирхоно. Интернет ресурс, мобильна утаһан холбооной туһаар бидэ, хүмүүжүүлэгшэнэр, фото, видео болон элдэб мэдээсэлнүүдые эльгээнэбди, зоноор харилсанабди.

    Үхибүүн бүхэн оршон тойронхи юртэмсэ тухай  өөрын һанаа бодолтой, өөрын дүршэл шадабаритай, өөрын мэдэрэлтэй. Багашуулай зүрхэндэ харгы олохо, үнгэтэ юртэмсын элдэб юумэ ойлгожо  абаха ошохониие бадарааха, үхибүүдэй бэлиг шадабари элирүүлхэ, үхибүүе шагнаха, ойлгохо, шэглүүлхэ, онсо шэнжыень таажа мэдэхэ, тэрэнииень сэгнэхэ ёһотойбди. 

     Яажа, хэр зэргэ hонирхолтойгоор үхибүүнэй сэсэрлигтэ байха үень үнгэрнэб, тэрээнhээ уламжалан саашанхи харгыдаа зоригтой, эдэбхитэй, хамаг юумэндэ түбhэндэ, бэеэ даанги хүн болохо аргатай.

   Ажалайнгаа профсоюзна комитедэй түрүүлэгшэб. Манай эбтэй коллектив эрдэм болбосоролой ажалшадай спартакиадада, спортын мүрысөөнуудтэ, наадануудта г.м. абьяастайгаар хабаададаг. Сэсэрлигтэ олон жэлдэ ажаллаһан, мүнөө наhанайнгаа амаралтада  байһан ветерануудаа хүндэлжэ, уулзалгануудые үнгэргэдэгбди.

      Теэд ямаршье ажал хэжэ ябахадамни, минии хөөрхэн хүмүүжүүлмэлнүүдэй, үхибүүдэймни амжалтанууд намда тон ехэ омогорхол, бахархал түрүүлдэг, урма баярым бадараадаг.

     Үхибүүд – наһанай сэсэгүүд гэдэг гээшэ. Тиимэһээ үхибүүдтэ шадамар харууhан хэрэгтэй. Хүмүүжүүлэгшэ болобол амиды уһан шэнги. Яажа үрэhэн байхадань  уһалжа эхилнэбши, тиимэл сэсэг урган hалбарха.  

    Үхибүү хүмүүжүүлхэ минии гансал юрын  ажал бэшэ, харин  нангин үүргэмни, сэдьхэлэймни татаса, зүрхэнэймни сохидол, ажабайдални...